أوعاك تتكلم فى السياسة

أوعاك تتكلم فى السياسة
دا السياسة شئ خطير
مالك انت ومال مبارك ولا بوش
سيبك حتى من الخفير
عيش جبان .... طاطى
عيش جعان .... راضى
إنحنى للأمير
عيش زى تور مربوط فى سايقه
زى أهلك عالحصير
..........................................
يابنى سيبك من كلام المخبولين
مالها مصر .......؟
انت أعمى مش تشوف
التقدم والحضارة
مش تشوف التطور
والصدارة
والوظايف كتير كتير
....................................
مالك انت ومال جمال
خليك فى حالك
عيش و ربى فى العيال
يابنى داهو الكمال
حتى إسأل اسرائيل
مالك انت ومال إيران ولا كوريا
سيبك أنت من فرنسا ووحتى سوريا
إمشى أعمى ....
أسمع كلام الكبير
السياسية شئ خطير
...................................
بس أوعى
لو فى يوم سألك منادى
إنت ليه سيبت حقك
أوعاك تقول
كنت بسمع لولى أمرى
الخليفة والأمير

بقلم:- أشرف مقلد